香港各大小社團不停上京見中央領導，條隊一路排到九月中下旬；但領導肯見你，唔代表一定識得你；好似噚日鄉議局四十人見國務委員唐家璇，就有聞所未聞嘅事發生。
話說噚日朝早，鄉議局主席劉皇發帶隊入中南海見唐家璇，接待規格係所有訪京社團中最高嘅。通常港官見領導，一見面立即握手傾偈，不過發叔入到紫光閣時，唐家璇竟然首先自我介紹，驚死人唔認得佢，又好似唔識發叔咁，問佢係咪就係劉先生。之後唐家璇同所有鄉議局代表握手，點知有人竟然用廣東話講「你好」，搞到唐家璇後來猛問班客人聽唔聽得明白佢講普通話，又放慢速度講嘢。
更妙係有位仁兄馬上擦鞋，話喺電視已經聽慣唐家璇講話，逗得唐家璇好開心；呢位仁兄係邊位？姑隱其名，總之唔係發叔。
最搞笑係唐家璇突然變身做導遊，向代表團介紹紫光閣，慢慢逐隻字解釋，「紫是顏色的紫，光彩的光，光明的光，閣是閣下的閣」，又話呢個地方明朝已經有，𠵱家係中央政府領導接見貴賓嘅地方，然後重繼續滔滔不絕介紹中南海，好似帶大鄉里入城咁。
到最後，唐家璇向記者大力挺董，點知現場工作人員趕記者離場，有記者衝口而出向工作人員講：佢挺緊董就等佢繼續啦！點知工作人員一邊推記者走，一邊洩露機密：「誰做這個位都這樣說！」真係坦白。
傳真︰2623-9278
電郵︰