上星期五至星期日，寶馬代理替全新5系，響灣仔搞咗個大型車展，場面可謂十分墟冚，亞Mark聽聞幾日嘅入場總人數，竟多達二十多萬人次，以單一代理商搞嘅車展睇嚟，都可謂空前成功喇！然而，令代理高層至飲得杯落嘅消息，相信會係新5系嘅累積定單，經已接近二百部。據知代理對此消息大為緊張，除即時向車廠滙報之餘，並要求今年嘅新5系Quota，加推至240部咁多，以免向隅者要多等至明年嘛！
相信好多車迷都跟亞Mark一樣，好想知道新5系邊款型號至深得車迷歡心呢？據亞Mark向代理打探得知，一如所料係525i同530i至搶手，皆因前者定價不過50萬頭，加上2#.5公升內嘅牌費較便宜，而後者則性能出眾，可有恍如一部高性能房跑車嘅演繹㗎！由於今年嘅Quota所餘無多，若你想響聖誕節前做新5系嘅車主的話，咁就真係要行快一步，向代理查詢訂車嘅事宜喇！