秘書小姐V鍾意久唔久就玩新手機，佢個老闆平均兩年換一部，秘書V就一年換兩部，緊貼潮流。話說皇馬來港，碧咸引死人，報紙報道碧咸一日打二十次電話搵老婆，用嘅手機就係西門子SL55；其實皇馬球衣有西門子贊助，心口一大個字SIEMENS，球迷個個睇得見。
秘書V老闆唔知喺邊度班咗一部西門子S55，係舊款咯，香港唔多興。秘書V就巴閉咯，睇完碧咸，就利用CSL優惠計劃，訂咗一部One2Free西門子SL55，重要耐性等多成個月，先至有貨。
收到新機之後，秘書V鬼咁開心，拎出嚟示眾，畀大家摸吓，點知用咗兩日之後，佢發現手機存有鄭秀文嘅歌曲，點解呢？唔通隨機附送？自己冇下載過鄭秀文嘅歌㗎？再㩒多幾個掣，發覺機內竟然存有幾十個短訊，內容乜都有，但留言者冇一個記得係邊個。於是問吓另一個經常換機嘅秘書A，交換情報，秘書A話：「我就懷疑你架手機係有人用過嘅，唔係新鮮貨！」唔係啩？CSL喎？秘書V於是打電話去服務中心問，講完一大餐之後，對方話：「可能真係舊機，不過都係99.99%新嘅，頂多有人用過一兩日。登記你嘅投訴，一有新機就換畀你！」秘書V用咗三千三百幾買架碧咸用嘅手機，乜變咗買二手貨？當堂覺得非常肉刺，幾乎想喊，要求老闆有機會見到蘇澤光，就當面投訴喎。