阿虎話口未完，中央即急急腳宣布放寬個人攜帶現金出境的上限至3.9萬元，自由行旅客又可帶多個錢來港吃喝玩樂、買股票、賭波、賭馬，掃化妝品與優質中成藥，中央真係救港心切。
唔知係咪有春江鴨收到風？噚日有大量資金入市掃國企，將國企指數推高3.49%至3340，創五年半新高，而近日成交一直下降嘅港股，成交額亦急增至逾150億元，恒指藉中港美經濟前景向好，大升148點，收10908。
東方海外（316）自宣布向長和以每股9.80元回購4695.7萬股後，股價一路係咁升，噚日收17.20元，計落長和帳面賺少近3.5億元。若東方海外真係通過回購，則公眾持股量會降至19.39%，若要回復至25%，唔係阿董家族減持，就係東方海外要配售新股。
東方海外中期賺6.2億元，全年料賺12億元，現價PE僅7.2倍，對基金甚具吸引力。東方海外若能於現價配售相同數目新股，既可回復公眾持股量，又可即賺3.5億元，何樂而不為呢？不過，黑客話，論基本因素，隻股重可以托高啲才批股，而股價愈高，股東會通過向長和回購的機會則愈大。
Tom.com（8001）證實話考慮分拆短訊業務上市，消息刺激股價勁升10%，收報2.475元，成交1.78億元。但Cookie話短期內唔可能成事，因為短訊業務在國內發展潛力驚人，連中移動（941）都以此作增長點，試問Tom又點會咁快分拆呢？如果真係分拆，芬佬隨時沽Tom，換馬買入短訊業務股份。
阿虎