特首董建華呢輪好風騷，皆因北京諸公畀晒面，派副總理級人馬曾培炎南下，當面問你重要乜嘢幫手？又令國務委員唐家璇對住電視機鏡頭公開挺佢，咁老董除咗痛哭流涕、感謝不已之外，惟有更加勤於工作，不敢偷懶。
咁又係嘅，北大人都車輪轉咁接見啲香港各界代表團，聽講啲港人個個心口都有個勇字，一於冇有怕照數老董嘅不是，你話幾攞命，真係補飛都補唔切。
結果老董呢個假期冇假放，連今日星期六下晝亦照樣見工業總會同廠商會嘅代表，話要聽商界意見喎。
八方同佢計一計，由七月中老董聲稱會洗心革面、從頭做起開始，佢一共見了各政黨人士、地方人士、商界、學者同傳媒，加埋噚日見中總、總商會以及貿發局嘅代表，都有十幾二十批。呢類會面有冇用八方唔知，不過阿爺唔等得你，已先行放水放人，搞旺番個市。
傳真︰2623-9278
電郵︰