搞安琪蓮娜過眼雲煙<br>伊芬鶴基戀肥模激走奧瑪花曼

搞安琪蓮娜過眼雲煙
伊芬鶴基戀肥模激走奧瑪花曼

結婚五年、兼有一個五歲囡囡同一個一歲大囝囝嘅伊芬鶴基(EthanHawke)同奧瑪花曼(UmaThurman),一向都係低調但又相當恩愛嘅銀壇夫婦,不過呢排接二連三傳出形象正直嘅伊芬搞婚外情,佢兩公婆嘅婚姻瀕臨破裂,近日佢哋更分埋居。

密密偷情
三十二歲嘅伊芬早排喺加拿大蒙特利爾拍電影《TakingLives》時,已經被人見到佢同拍檔安琪蓮娜祖莉(AngelinaJolie)搞搞震,兩個匿埋喺片場嘅暗角親熱,不過原來呢單嘢都只係虛火,伊芬同二十二歲加籍金髮肥模JenPerzow先至係嚟真。
話說伊芬同肥Jen唔想咁揚,經常喺佢租嗰間屋入面偷情,重一直維持到伊芬八月拍完片離開蒙特利爾為止。

難忍不忠
最初奧瑪花曼知道老公偷食,兩個曾經傾過,奧瑪認為佢都係一夜情,畀次機會佢,點知後來有人話佢知伊芬真係搞婚外情,重成日都係同阿肥Jen一齊,奧瑪決定唔會原諒同再畀機會個衰佬。
雖然伊芬同奧瑪花曼已經分開住,但係據聞現階段重未計劃離婚,話唔定遲啲可以破鏡重圓。