余文樂喺下個月會出新碟，但出碟前夕偏偏好事多磨，馮仁昭收到風，日本運動服Champion想搵香港藝人擔任代言人，本來傾好由余文樂拍廣告，聽聞阿樂重預咗檔期影廣告硬照，點知廣告商最後竟然飛起阿樂，改搵人氣組合Shine做代言人。
運動服品牌本來想搵人氣男偶像配一個女模一齊拍廣告，由於阿樂同StarzPeople模特兒公司重有合約，呢次StarzPeople同佢傾廣告時，就提出想搵埋同一經理人公司嘅余文樂師妹鄭融拍攝，但廣告商就覺得外形成熟嘅鄭融唔太適合，結果大家傾傾吓就冇咗下文，呢次阿樂唔止冇咗個廣告，廣告商原本諗住贊助阿樂出碟，但𠵱家連隨碟附送嘅折扣優惠券計劃都冇埋。
負責接洽呢次廣告嘅OpusTwo公司市務總監朱小姐，噚日就話廣告商係有諗過搵阿樂，但之前廣告商都曾兩度搵過Shine合作做活動，所以最希望都係搵佢哋兩個做代言，至於鄭融唔啱拍廣告，佢話唔關事，因為個廣告點都係以男仔為主喎。
傅天穎（奀妹）早排同佢二哥二嫂由台灣嚟香港，奀妹話啱啱簽約二嫂做佢經理人。問奀妹同二嫂之間嘅酬金點計？佢話：「做嘢賺嘅酬金得我哋兩個人分，肥水不流別人田。」奀妹早排都簽咗纖體公司，積極減肥，奀妹自覺開始見到啲成績，重問人佢係咪瘦咗好多。奀妹說：「我想減多六、七磅，平時喺手同腳搽啲cream，做下運動就減到。」
江欣慈前晚喺銅鑼灣一間酒吧出席一個音樂會，重同現場百幾位歌迷jam歌，氣氛熱鬧，音樂會期間有一名外國男人拎住江欣慈嘅一張專輯，要求影相簽名，重表示好欣賞江欣慈嘅音樂才華，江欣慈知道後當然開心到不得了，估唔到連外國人都識得欣賞佢嘅演出。
有「電視怪傑」稱號嘅蔡和平昨日喺中環辦公室同一班記者見面，自從佢間華娛電視台喺年前結業後，蔡和平都有一段時間冇出現。原來佢秘密構思咗一個有獎遊戲節目，重先後賣咗去多間外國電視台。香港嘅無綫電視就買咗嗰版權改名「橫掃千金」。問蔡和平會唔會重投電視業，佢話：「短時間都唔會嘞。」
