升市莫估頂，個市繼續升，淡友呢鋪輸得傷。恒指昨日急升148點，收10908，有大成交支持，睇嚟萬一點心理關口擋唔住，分分鐘下周一就破。
滙豐（005）回復火車頭本色，高收101.5元，升1.5%。昨日推介短炒嘅滙豐Call輪9845，由68仙彈上85仙，大升25%，數據依然不俗，可以揸住先。
中移動（941）升1%，收20.05元，未算大郁。比起其他大藍籌，中移動明顯落後，9RSI現處57（長和早已超過80），有排都未超買，好友要做世界，呢隻重磅股一定有份。昨日推介中移動Call輪9861，只係升咗8%，畀少少耐性揸多陣，應有收穫。
新地（016）亦有勢，高收56.25元，升2.7%。搵新地Call輪玩，9001可以考慮，明年2月初到期，現價92仙，槓桿率6.1倍爆炸力係細啲，但溢價2.6%又幾吸引。
佐丹奴（709）是日大升5%，帶動唯一嘅佐丹奴Call輪9702飛升59%，成為輪王。正股突破2.9元阻力後連日上升，有機會上試3.5元，以昨日收市價3.25元計，重有些少水位。9702明年1月尾到期，溢價11.7%，槓桿率9.3倍，數據不過不失，可以小敲，但有利潤就要走，提防正股回吐。
章盛