唐英年上京述職，愛紅酒嘅佢好識做，噚晚同商務部副部長安民喺入住嘅港澳中心晚宴，就即席送咗支Mouton紅酒畀安民，𠱁得安民不知幾高興。
八方重八到佢哋晚宴食嘅八道菜，除咗頭盤香芒沙律蝦之外，重有鵝肝汁帶子、紅燒蟹肉翅、荷香桂魚球、靈芝菇鮑魚、瑤柱扒蘆筍、四川式冷麵，糖水係凍楊枝甘露。菜式唔算特別名貴，但係都出得大場面，每位盛惠人民幣三百八十，以一圍枱十二、三人計，呢餐飯食咗四千五百幾蚊，特區政府找數。
另一邊廂，留守香港捱義氣幫唐少署理財司嘅葉澍堃，噚日同八方及一眾行家茶敍，講開自由行大軍殺到。葉局長出名醒目，入境嘅問題屬保安局李局長範疇，佢點都唔肯過界保證幾多分鐘內可以過關，但就爆咗自己最近微服出巡，都覺得過關好快。
八方笑葉局長過VIP通道，梗係快啦；點知局長話，邊度有啫，重好風趣咁話自己不過姓IP，如果改個V字頭嘅英文名就好啦，真係VIP咯。
傳真︰2623-9278
電郵︰