晚上九點正，路經旺角登打士街，就在家樂商場附近，竟見到三名貌似金毛偶像E-Kids的少年，周街揮刀舞槍鬼殺咁嘈，一邊打埋鑼更贈興，重以為旺角治安真係差成咁，殊不知望真下，原來鬧事者並唔係「偶像」E-Kids，只是隔鄰有間名為「KantoHobby」玩具店開倉的拉客新招，嚇得我！
記者：尹珊珊
攝影：陳漢榮
三個只肯出鏡唔肯出名的哥哥仔話，周街玩刀玩槍無非都係為份工：「我地幫間玩具店做暑期工，每人要輪流企出門口拉客，無傳單派，得塊大紙牌唔夠睇頭，而且呢度咁嘈，叫到喉頭痛人哋都未必知你講乜，有埋動作配合就好好多。」其中一位少年甲補充：「我哋做玩具店，梗係用番玩具做道具，順便可以show埋啲貨。」
講完一輪，少年甲乙丙為咗證明他們的奇招有效，即時再揮刀武槍表演一次，果然吸引到對面潮流特區門口的路人眼望望，停晒腳等睇戲，亦有部份人聽到鑼聲即大皺眉頭，一臉不屑，急急腳行咗去，好彩玩咗十分鐘便有個同少年甲乙丙差唔多年紀的男仔，恍如感受到三人的號召，睇完show後真係入舖幫襯買玩具。
話時話，佢地三個咁落力，老闆關生點睇先：「佢地咁幫手梗係好啦！頭先真係多咗人望，我都有幫手企埋一邊叫咪，總之生意好時大家都好啦！」
