估唔到主理大榮華酒樓嘅梁文韜竟然話自己酒樓嘅火腩唔夠好味，「酒樓多數只賣燒腩部位，無可能原隻豬燒，所以唔及得呢度啲燒腩肉咁正，重日日用由元朗農場運到嘅新鮮豬原隻燒，燒腩特別皮脆多肉汁，我食親燒腩肉都嚟呢度。」可以令韜韜個個星期都嚟幫襯食燒腩嘅，就係呢間喺元朗屹立咗40多年嘅金記。
記者：馬慶武
攝影：伍慶泉
Model：Clara(Sunspot)
梁文韜話自己嘅酒樓整火腩已經好講究：「先將腩仔肉燒到6、7成熟，再不斷淋滾油直至全熟為止，咁樣皮脆之餘，又保住肉汁。」不過講到尾，始終不及金記嘅原隻燒，因為原隻燒火力平均，而且因為燒嗰陣豬尾係向上吊起，所以豬腩以上部位嘅肉汁、甚至塗上嘅醬汁精華，都會有大部份流落腩肉部份，令到半肥瘦嘅燒腩肉最香最富肉汁。
「好多元朗人支持，甚至有市區客專程揸車入嚟買燒肉，所以金記一日可以賣晒8隻豬。」金記老闆譚先生話金記位於元朗，近養豬場，所以運豬成本較低之餘，豬亦保證夠晒新鮮，肉質及肉味絕對唔係冷藏豬或大陸冰豬可比。
一隻豬重3、40斤，腩肉部份只佔約9斤，佔全隻豬4唔夠嘅燒腩肉最好味最搶手，因為肥瘦均勻，肉汁又豐富。梁文韜最愛豬腩肉，不過亦愛肋骨部份嘅「隔紗」：「隔紗係形容脆皮及半肥瘦肉中隔着一層肥肉，皮脆肉嫩滑，而且燒肋骨好入味，同豬腩肉可謂平分秋色。」
老闆譚先生話燒腩肉係最搶手嘅部份，肥瘦均勻多肉汁，最好味當然最快賣晒啦。
「先蘸啲芥辣，再蘸啲砂糖，甜甜哋又辣辣哋，同燒肉嘅鹹味好配合。如果唔係送飯食，又覺得燒肉鹹過頭，咁食就啱晒。」金記譚生話元朗好多人都咁食燒肉，尤其係老人家。
一件燒肉睇得出分開幾層：皮、肥肉、半肥瘦肉、瘦肉，骨，就叫做隔紗，口感豐富之餘，食落重特別嫩滑。
梁文韜話呢度啲叉燒雖然話係用舊式猛火方法嚟燒，始終唔夠舊時用炭爐燒嘅叉燒咁入味，不過由於衞生問題，𠵱家喺香港都食唔到炭爐燒嘅叉燒喇。
原來叉燒中燒到燶燶哋嘅部份行內人叫做「火雞」，韜韜說：「呢度啲叉燒都好正㗎，用猛火嚟燒，肉質鬆化多汁，表面有啲『火雞』脆脆哋，口感味道都一流。」
金記燒腊飯店
地址：元朗福德街56號精英大廈1號舖
電話：24781996
營業時間：4:30am-8:30pm