日前黃伊汶（Emme）去咗元朗一間鋼鐵廠拍新歌《ShowMeLove》嘅MV，嗰度地方好荒蕪，周圍又熱又多蚊，最弊屋入面冇冷氣，Emme同班舞蹈員開頭喺間廠入面又唱又跳，熱到暈咁滯。一心諗住捱到拍外景會涼啲，點知重辛苦，導演要佢扮個精神分裂者，要佢幻想自己臨死前坐電椅，又俾人綁喺十字架上然後俾火圈圍住，Emme話嗰種感覺真係好似喺死亡邊緣咁，好驚喎。
後來導演又要Emme瞓喺十字架上面，俾啲點咗火嘅威士圍住，嫌啲火唔夠猛又要加汽油，Emme瞓咗幾分鐘後，啲皮膚又紅又腫，好似灼傷咁，拍完MV重要即刻去睇皮膚醫生，Emme話未試過有呢種搵命博嘅滋味，當時真係好驚，覺得自己差啲變咗燒豬。因為要瞓地拍嘢，佢三套總值萬幾蚊港幣嘅衫都整污糟晒，報銷呀。
洪金寶冇再幫周星馳拍電影《功夫》之後，呢幾日就偷得浮生去咗深圳寶安打高爾夫球，佢話趁機休息吓，而下個禮拜一佢會返美國探老婆同個女，重會傾套西片㖭。問佢近日嘅身體點？因為有話佢血壓高，佢一聽完就好勞氣咁話：「我俾人激親先至血壓高，我不嬲都冇血壓高，膽固醇高就有，因為我鍾意整嘢食。」再問佢係咪同星爺鬧不快先唔拍落去？佢就冇正面咁回答，只係話：「我只係動作導演，佢係導演，乜決定都係要問導演啦。」
早排關心妍（Jade）去咗紐約登台，佢話大停電之後市面都好正常，雖然好擔心有恐怖襲擊，但阿Jade一早收晒人錢，所以冇得改期。點知阿Jade去到好黑仔，上台前有工作人員擺烏龍熄咗成間酒樓嘅大掣，所有燈熄晒，嚇到全場人以為又停電，好彩半分鐘內着番燈，到阿Jade唱完歌後行落台時跣親，搞到雙膝跪地，兩個膝頭哥瘀晒，連慶功都去唔到。
麥浚龍（Juno）同傅珮嘉噚日喺商台出席一個體育精神活動，Juno對於有指向來愛錫佢嘅唱片公司高層陳少寶，因涉「樂壇貪污案」後公司不與他續約，而他將會與另一涉案高層自組公司，Juno說：「係咪真㗎？我上星期見到佢都冇提起任何嘢，如果係真就覺得好驚訝，亦覺得好突然。」若少寶真係另起爐灶，Juno話：「我都未考慮過。」
盧巧音、庾澄慶和石修等，噚日喺銅鑼灣保良局莊啟程大廈出席無綫《星光熠熠耀保良》嘅記者會。身材瘦削嘅盧巧音被問到會唔會考慮豐胸，佢就話：「都有人搵過我，自問身材都有少少，但都可以試吓，睇吓有冇效。」盧巧音同陳小春合作嘅新片《女左男右》雖然趕緊拍攝，但係近日因天雨影響，拍攝進度一度受阻，盧巧音表示要等小春返港後先至可以繼續拍攝。
郭富城全新廣東專輯《InTheStillOfTheNight》噚日推出，城城近年大碟嘅產量唔係多，由於城城話要貴精不貴多，今次足足用咗三個月時間製作，務求達到慢工出細貨嘅要求。今次大碟嘅封面搵咗著名美術指導朱祖兒親自操刀，將相片製作成一輯充滿電影感嘅小冊子。為咗加強海枯石爛嘅癡心感覺，城城重搵嚟一具骷髏頭做拍檔，嚟一招深情對望，唔知城城嘅歌迷睇到會唔會被嚇親呢？
