「七號」球衣對曼聯係神聖嘅，點知今屆着咗呢件衫嘅葡萄牙仔基斯坦奴就「神神哋」，搞到隊中大佬之一嘅加利仔火都嚟埋；雲尼斯達羅重因為佢而破唔到連續入球紀錄，當然上盤客就更加多得佢唔少。
話說基斯坦奴周三首次踢正選對狼隊，點知佢一味「個人騷」，做濕手巾，要過幾件至罷休，完全唔理隊友走位，加利仔喺右路幫佢都話之你；又示意雲尼斯達羅唔應該咁畀波，扮晒大佬，畀醫院波又多過人……
結果加利仔忍唔住鬧佢，雲尼斯達羅就因為佢唔交波冇晒機會，連續十一場入波夢碎，曼聯最後小勝一比○，連上盤客都受害，真係冤枉！
計我求大俠話呢位後生仔重有排磨練，唔好睇咁高住。
馬略卡日前輸咗個西班牙超級盃畀皇馬不特止，重輸埋聲譽，因為佢哋嘅進攻中場伊巴加沙日內會過檔馬體會，但係馬略卡夾硬要佢喺超級盃上陣。馬體會對呢件事好唔滿意，因為西甲周末就開波，一個唔好彩伊巴加沙傷咗就麻煩嘞。我求大俠今次真係唔幫馬略卡啦！
周二晚一輪「和局」風吹到通街下盤，前晚好多人以為可以正常啲，點知都係上盤客嘅「黑色午夜」。曼聯、多蒙特、利物浦、阿積士等強隊全部累上盤客輸錢！都係阿仙奴亨利最生性，原本讓球半嘅阿仙奴，全靠亨利補時階段整多粒先贏二比○，上盤客至唔使血本無歸！
今個季初，似乎真係特別旺嗰啲老鬼球員，周二晚舒寧咸喺英超入三粒威到盡，前晚德甲球隊羅斯托克嘅三十五歲老將麥斯，亦𡁻入兩粒幫球隊迫和漢諾威三比三。計埋呢兩球，麥斯喺連續三場比賽入咗六球，重勁過一眾當打後輩前鋒。嚟緊賽事，記住唔好睇少嗰啲老鬼球隊嘞！
溜馬教練湯馬士噚日突然畀上任冇耐嘅營運總監「小鳥」布特炒魷，所謂「一山不能藏兩虎」，其實自布特重掌溜馬後，湯馬士幾乎已注定要被祭旗！原來佢兩個早喺大學期間已經係死對頭，入咗NBA後又經常喺季後賽打生打死、水火不容，真係不是冤家不聚頭囉！