香港人原來最鍾意睇電視，「尼爾森媒介研究」指出九成八香港人有睇電視習慣，為亞洲之冠。不過最弊就係啲兒童（9至14歲）唔多睇報紙，每次只花30分鐘以下。但有三分一香港男士每日睇報紙一至兩個鐘頭。
即係話，報紙唔啱比較年紀大嘅男人睇，銷路可能會差啲咯。有啲報紙成日話搞年輕化，唔好做老餅，原來係對牛彈琴，做到身水身汗都賣唔到紙，皆因年輕人鍾意電視，唔慣睇報紙也。電視台節目可以搞年輕化，報紙內容搞年輕化，簡直嘥時間。
電視新聞行尊R最近為咗訓練大批新畢業生上戰場，花咗唔少心血。呢晚食飯時，碰到佢一個人食一碟油雞髀飯，佢叫左丁山坐低傾吓偈，講起新人，行尊R就話：「最大嘅問題係乜嘢呢，包你估唔到？」左丁山估咗三次，包括中英文水平、工作態度、好食懶飛，行尊R都話唔啱。答案近似「尼爾森媒介調查」噃，行尊R話，「原來啲新人冇睇報紙習慣，呢樣勢難容忍，我要特別向佢哋訓話：做新聞記者，點可以冇睇報紙習慣，你哋一定要睇！」講就容易啫，點逼佢哋睇？行尊R話：「我要啲supervisor跟進，久唔久就quiz啲新人關於報紙時事新聞！」唉，大學畢業打份工，重要俾上司督住睇報紙？真係不可思議。左丁山畢業時到怡和面試，就因為每日睇報紙雜誌太多，而俾人踢出局，後來知道原因，人哋話左丁山太花心喎。