一如芬佬所料，個市調整完又再升過，國企升勢重急，噚日期指結算，午市走勢未有如淡友所料般質低，反而掃到高收，後市可向11000進發。
國企指數大升104點，升幅3.3%。一拖（038）出現轉捩，加上前景展望樂觀，追捧不絕，大升8.3%，創出今個升浪新高，睇勢重有得去。中石油（857）盈利比預期佳，股價亦創新高，基金對此股鍾愛有加，目標價初步睇3元，相信好快會實現。
遠東發展（035）獲里昂品題後，聲價十倍，股價表現亦脫胎換骨，聽聞呢幾日有好多芬佬登門造訪同求貨，噚日就有兩手大成交，一手2400萬股，一手1700萬股，成價同為0.95元，銀碼約4000萬元，唔算大，相信接貨嘅基金唔夠喉，仍會在市場吸納。噚日大手成交上板後，股價立即三級跳，搶上1.19元後回收1.12元，大升15.4%，成交1.45億股，基金買咗唔少。
上個禮拜，遠展由0.6元起步，升上1.09之後調整，形成旗形，噚日破位而上，升浪再現，短期量度上升目標為1.55元，預期升幅接近40%。遠展現年度（3月年結）每股盈利估約17仙，下年度將大增到47仙，以1.55元計，PE亦僅3.3倍！
剛啱話完新世界全系都好強勢，噚日就立即上演好戲，新創建（659）升5.5%、新世界基建（301）升6.6%、同埋隻新世界中國（917）亦有近4.0%進帳。至於新世界發展（017），雖下跌1個位，但噚日地產股普遍不濟，好似恒地（012）下跌0.8元，長實（001）同新地（016）都跌1個位，新世界有咁強表現，已算不俗。
講番新基，呢半個月嘅表現，真係威風八面，升咗成倍有多，呢一輪在高位整固，噚日又㩒唔住，搶上1.6元高收，成交又大增至2185萬股，呢個浪，上升目標指向2.0元。
科技行業復甦，新基重組後主力經營高科業務（包括電訊、媒體同科技），市場資金已開始流向科技股，新基亦成為基金同大行收集嘅對象，新基街外貨源不多，一有大手扯吸，股價升勢必急。講到資產淨值，新基每股淨值9.08元，就算折讓70%，股價都可見2.7元。
郭兆誠