中環太子大廈商場噚日下晝好迫人，皆因專賣電子消費產品嘅萬威國際首間概念店開幕。萬威個名可能唔係好多人識，但佢哋都幾夠人面，商賈名流都有去捧場，其中包括「哥頓」胡應湘，原來佢同萬威主席陳煒文都係理工大學校董，梗係要去打氣。八方見到哥頓，當然要問吓港珠澳大橋進展，佢好樂觀，相信今日政府開會後，再多一兩輪會議就會拍板，重話年底前可以搞掂。
哥頓成日話要交棒畀細仔胡文新，八方知道佢重有三個願望，除咗大橋之外，想起一條連接屯門至大嶼山機場嘅跨海橋，同埋西環至迪士尼樂園嘅矮橋。咁當然最大心願都係港珠澳大橋啦，佢笑自己好似做咗傳教士，一日到黑都係同人講橋。八方又聽聞一向支持起橋嘅賭王何鴻燊，話過大橋落成之後，會送一份大禮畀哥頓──就係佢所有噴射船！唔做船之後佢會轉行做車，幫啲揸車過橋去澳門嘅車主「代客泊車」，相信將會更好搵。
講番萬威間舖開張，東亞銀行主席李國寶，同埋今日作為亞洲協會首次環球論壇主講人嘅日本「策略先生」大前研一，都有份剪綵；原來萬威財務總裁李國法係李氏家族嘅人，老竇係馬會前主席李福深。而大前研一就係萬威獨立非執行董事，更義不容辭。
傳真︰2623-9278
電郵︰