曾叱咤香港車壇多年，就連亞Mark遇見都會一如Fans碰上偶像嘅心情，對老一輩車行中人，可謂無人不曉嘅梁錦棠（HenryLeung），早前毅然接受新挑戰，轉職到其他行業並出任高位，可謂成為一時佳話。然而，亞Mark間接得到新消息，話梁Sir響誠意打動下，決定重投香港車壇，之不過並非出任代理商嘅高薪要職，反而會係近年不斷向海外拓展汽車業務嘅人頭馬車行，出掌營運總監一職，直接向車行揸Fit人嘅EricWong滙報，而且重會響嚟緊9月1日正式到任。亞Mark除咗要向梁Sir恭賀外，重要恭喜EricWong能夠覓得猛人相助呢！據聞，人頭馬車行重會繼續向車行中人打主意，除咗係想鞏固架構外，早傳佢哋有意競投汽車代理權，相信傳聞亦非無中生有；再者，有梁Sir咁資深嘅車壇中人扶持，不但對車行日常運作暸如指掌，跟歐洲車廠更加稔熟，而昔日安佳成上市公司，梁Sir亦功不可沒㗎！