大多嫌貴調頭走
政府大力推動嘅「自由行」似乎未有惠及Game壇，一擲千金買遊戲嘅同胞真係少之又少，究竟有幾多內地遊客會在香港購買遊戲商品？噚日問開啲舖主，好多都話內地遊客就算入嚟問價，都會嫌貴走頭。鬼咩，據做開大陸電器嘅行家講，上面七、八成舖都係賣二手翻新機再加老翻咁賣，香港正當舖頭邊有力同人爭？喺香港買部貴啲嘅又冇老翻送。𠵱家惟有寄望上海北京開放「自由行」之後，有更多具知識產權觀念嘅客先有得救！
GC《TOS》頭批貨勁貴
Namco新作《TOS》前幾日抵港，由於有代理返貨，所以例牌又係早過日本見街。不過近排代理唔知係唔係受到「自由行」影響，批發價就加到上天，隻Game𠵱家市價要$430至440左右，比平時一般同定價遊戲差不多貴一成。而GBA隻《新約聖劍傳說》亦已返貨，市價約$320。
XBOX《真．三國無雙3》抵玩套裝
剛推出嘅XBOX版《真．三國無雙3》比日本足足早成個星期派貨，今次行貨遊戲除咗用原汁原味日本內容之外，重同PS2版看齊，附送中文說明卡，不過定價就成$450，真係貴咗啲。而主機加遊戲嘅特別版就賣$1,798，計落部機平成百蚊，有興趣出機不妨諗吓佢。
