新車速報：<br>光岡Zero-1RS全港只此一部

新車速報：
光岡Zero-1RS全港只此一部

日本光岡（Mitsuoka）汽車，每部均以人手精製及裝嵌聞名；惟每款產量有限，往往令向隅者望車興歎呢！其中，又以一款Zero-1ClassicTypeF最為車迷追捧。雖然廠方經已響去年停止產製，但響車迷再三要求下，終決定生產一款終極版嘅Zero-1RS型號，但數量僅此10部，而響香港代理強烈要求下，全港惟一一部新車早前亦已秘密抵港；我哋重搵嚟人氣急升嘅黃琛瑜（Eva），實行香車配美人呢！
記者、攝影：陳偉林
Model：黃琛瑜

■全港唯一一部光岡Zero-1RS限量版，由0至100公里加速不過6.0秒而已。

古典造型不減活力一面
呢部充滿懷舊色彩嘅Zero-1RS，保持有原來ClassicTypeF風格，但原色金屬車身，配襯響鮮豔嘅黃色調子下，既奪目又見活力盎然，完全沒有予人感受到半點古典車嘅老態。再者，修長嘅車身設計，配搭上突出嘅雙圓頭燈，四輪拋沙板組合，還加有特大防滾架嘅點綴，響路上疾馳下嘅收視率，跟頂尖兒嘅法拉利及林寶堅尼跑車，可謂不遑多讓㗎！

■狹長嘅車頭設有橫柵式鬼面罩，還有兩旁透氣口作陪襯。

■四輪外露式沙板設計，配襯響一對特大頭燈，倍覺吸引出神。

■車尾置有外掛後備輪胎，既實用又見有一份吸引性。

■原色金屬玻璃窗框及倒後鏡配襯下，令人頓覺古典出塵。

■四輪配用上懷舊BBS鋼線胎軨，既典雅又充滿動感。

■尾輪拱用上硬纖維鑲嵌，有耐熱堅實嘅好處。

■全球數量不過10部嘅光岡Zero-1RS，車身上更備有設計獨特嘅貼紙，以資識別。

簡約座艙極具跑車氣息
個子小巧嘅Zero-1RS，用上傳統SpaceFrame嘅鋼管車架結構，既紮實又輕盈，車重不過700kg，要比市面上任何一部迷你車還要輕，惟駕駛艙卻變得較狹窄，上落車還要帶點技巧及難度來。而車廂陳設亦來得精簡，除卻三個獨立圓表設計，中控台另有燃油存量及油溫計，以及一排警示燈同冷氣裝置；然而，當你置身其中，感受就有如一部Formula1賽車一樣，幾乎靠貼地面嘅坐姿，還有從死氣喉不斷傳來嘅咆哮聲，都會令人有躍躍欲試嘅衝動呢！

■車尾有粗壯嘅防滾架結構，可確保乘客翻車時不易受傷。

■中控台鋪排以一列警示燈最奪目，當然少不了重有燃油及油溫表嘅一份兒。

■限制於車體架構，座席空間變得緊湊，好有Formula1跑車氣燄。

■難得一見嘅小巧皮包，大可用作存放雜物用。

發揮至極完全係力的演繹
對於平日揸開自動波車，又有風油軚同BrakeBooster嘅駕駛者來說，要駕駛呢部Zero-1RS絕對不是味兒，皆因上述裝置一概欠奉，既要講求駕駛技術，又會係男士一項力的表現，惟大比例嘅三幅式跑車軚環充滿路面感，加速感又強烈而充實；再者，極低重心結構，大可令人全無顧慮下肆意踏油門掟彎，令一台1.8公升直4偈發揮得淋漓盡致，同時，Roadster嘅開篷駕駛樂趣，亦可謂盡在不言中。

■雙搖臂加獨立柱式懸掛結構嘅優越性，完全表露無遺。

■一套5前速手波配搭，將動力源源不絕地傳到後輪，加速反應厲害。

■大口徑排氣喉組合，呼呼聲響令人目眩心動。

記者試完車後有何評價？
呢部仿60年代英國CaterhamSuper7嘅懷舊開篷小跑車，造型不減現代Roadster美感，同樣有奪目吸引嘅魅力外，全車淨重700kg、匹配一台1.8公升直4偈及手動波箱，加速感強而有勁，拐彎轉向更係每位男士力的表現，滿載駕駛樂趣之餘，重倍添有一份值得收藏嘅意味。

Eva又覺得部車點？
呢部充滿古典氣息嘅懷舊Roadster，既輕巧又充滿醉人魅力，每個部份都可謂係汽車工藝嘅結晶，若然能夠擁有它，馳騁響公路上，定必惹來不少豔羨目光呢！