「自由行」為香港注入生機，內地遊客大舉購物掃貨之餘，重會留意物業，睇下有冇投資機會，何文田豪宅新盤君頤峰，當然係佢哋參觀嘅目標，估唔到連海峽對岸嘅台灣客都嚟睇吓。
噚日中午，發展商新世界同埋信和，就招呼為數六人嘅台灣投資客參觀君頤峰，信和韓家輝話，呢個台灣團，喺香港從未有投資，今次來港，先後參觀過小西灣藍灣半島、奧運站上蓋物業同埋君頤峰，由於對本港市場及前景有信心，今次嚟物色投資機會。
除此之外，剛剛喺香港推銷嘅北京樓盤UHN國際村，發展商北京廣華軒房地產開發有限公司，噚日下晝就同北京二十多位傳媒參觀君頤峰。副總經理劉蔚話，不排除喺本港投資，但會夥拍大發展商。
睇嚟近排熱爆燈嘅「自由行」話題，連帶令中、港、台三地合作嘅機會都提升埋。
中原地產高級營業董事張焯賢話，火炭駿景園同大埔康樂園，因為平盤已經冇晒，價位升咗，但啲客仍然希望執筍盤，寧願等，搞到市場有輪候買平盤嘅名單。
駿景園千一到千三呎單位，價錢由三百一十萬，漲到三百六十萬，𠵱家有六個客輪候，搵三百三十萬到三百四十萬嘅單位。康樂園啲千六到千八呎洋房，唔夠一個月升值百幾萬，現有五名買家輪候，等啲五百零萬嘅放盤。
電盈前晚搞貝沙灣一期慶功宴，噚日攞到獎嘅代理行就即刻公告天下，顯示實力。美聯銅鑼灣道分行高級經理何璦麟幫個港資客，掃咗十八個單位，總值近兩億，攞到「單一最多成交宗數大獎」。利嘉閣奪得「最多外籍買家成交大獎」。
同系嘅港置，由夏笑笑帶領嘅發展商新樓專組，促成近四十宗交易，得到「個人最多成交宗數大獎」。
至於中原輝煌臺分行嘅簡汝明，促成貝沙灣四千幾呎複式，獲得「單一最大成交額大獎」。幾乎每間代理都有獎，獎品同樣係港麗酒店總統套房一晚。
長實映濤軒嘅HelloKitty示範單位功成身退之後，噚日有新主題登場，叫做「麥宅」，主人翁就係土產卡通人物麥嘜系列。全屋擺放唔少麥嘜家族成員，發展商話大概價值六萬蚊，最多就係唔同大細嘅毛公仔，重有餐具、浴簾、寢具等，相信今次可吸引唔少麥嘜迷嚟睇示範單位。
至於HelloKitty嘅擺設，由發展商舉行抽獎，將廳、房、廚房及浴室嘅精品，一一送晒畀買家，中獎者笑到見牙唔見眼。
蘭西
電郵地址：
