如果大家向來有留意開我哋嘅報道的話，相信都會知道富豪汽車，將會推出新一代S40車系，並繼續視年輕一輩車迷為主要針對目標；若然你對新車感興趣的話，咁就一定要留意嚟緊九月舉行嘅法蘭克福車展喇！因新車除會於場內展出外，隨後更會於2004年上半年於全球市場正式推出㖭！
從外形而言，新一代S40車系外表予人帶點同廠S60及S80車系嘅影子，尤其係車身線條及車尾造型，就最能將呢個特點展露出來；但細看下不難察覺新車頭燈用上黑底襯托，而尾燈布局亦與S60等車系有所不同，看來有家族Feel之餘又有自己一份獨特個性。至於引擎配搭方面，將備有多個型號供用家選擇，當中至頂級會係一台擁有220匹馬力輸出嘅T5型號。不過相信新車最吸引嘅會係其車廂布局，除空間較舊有型號來得寬敞闊落外，極具吸引力嘅中控台布局，設備齊全唔在講，佢更以銀白面板示人，倍見有一份吸引力；與此同時，軚盤及表板亦屬新設計，除把持感十足外，又見資料豐富易讀呢！
