小時候家住深水埗板間房的羅嘉良，因為天生口吃而論論盡盡，故他又名大懵良，其父便常敲他的頭，希望他早日口齒伶俐，幸而嘉良跟友儕在天棚學耍螳螂拳的同時，亦學懂分辨是非，努力付出，才得到今天的成就。
羅嘉良的父親以前從事鈕釦行業，但羅父家有妻室，又有三女兩子，當年家境不算太好，故一家人居於深水埗區的板間房。排行第三的嘉良，上有一個智障的二家姐，故家人對她自然倍加照料，難怪嘉良日前在尖沙嘴接受訪問時，就歎謂大家姐最為辛苦，因排行最大就最早打工，更要肩負照顧弟妹的責任。
嘉良從小已有口吃毛病，時至今日，他在鏡頭以外亦偶有口吃，他日前說：「我以前漏口，個樣又笨笨地，花名就叫大懵良，我姑媽以前喺街市賣菜，賣六毫子一斤菜心，我幫手睇檔，同人講嘢成日話六、六、六……六嚟六去都講唔出，所以我細個好少講嘢，好聽話，人哋講乜我就做乜嘅。」
羅父眼見兒子口吃，當然希望他盡早改善，嘉良說：「我阿爸成日用手指敲我個頭嘅，我記得到初初入無綫時，自己成日讀劇本，直至有次拍古裝，我一個人念咗好多頁劇本出嚟，全場啲人拍手掌讚，我至開始有信心，亦證明做嘢勤力，係會有回報嘅。」
嘉良的童年循規蹈矩，基本上他很少犯錯，平日只會留在家中，不過他在十一歲時，卻跟朋友的兄長學耍螳螂拳，他說：「嗰時我哋喺天棚練拳，又學自由搏擊，練到手骨好硬淨，但我細個太細膽，唔敢撩事鬥非，而且我好細個就識分黑白，老師都話我乖，逢係啲風紀行長班長都畀我做，後尾就因為不時俾老師睇得起，自己至有番啲自信咋。」
採訪：朱芷瑩
