個市又升過，恒指昨日回升81點，收10760，距離萬一點只差240點，兩隻火車頭再郁多兩郁，恒指就破萬一。
兩隻火車頭係中移動（941）同滙豐（005）。中移動臨尾連20.05元都有人剔，收20元，升25仙。滙豐收100齊頭，升1元，除息後透透氣，再嚟過。
兩隻大藍籌，搵相關Call輪炒吓，可以搵真銀。
中移動Call輪似乎冇乜可以揀，主角始終係9861，12月到期，輪價26.5仙，溢價3.3%，槓桿率7.5倍。隻輪成交金額近16球，未係最勁，同類輪9046與9929成交金額重大，不過兩隻輪溢價高好多（前者11.7%，後者14.6%），雖然壽命長啲同埋槓桿率大啲，但計落都係9861抵好多。
滙豐Call輪比較多啲選擇，想搏殺或者想穩陣投機，都有得揀。
溢價太高嘅最好咪諗，9845啱短炒，12月初到期，輪價68仙，溢價1.8%，槓桿率14.7倍。
想慳啲皮唔多想畀溢價，揀9836，隻輪明年2月到期，輪價1.14元，溢價得0.3%，槓桿率8.8倍，數據靚極，但凡事冇話十全十美，隻輪成交嫌少，炒起上嚟冇咁活。
章盛