港股噚日最惹人注目係乜嘢？當然唔係電訊盈科（008）公布業績，皆因大家一早對佢心淡，主角係近排炒到飛起嘅遠東發展（035），噚日隻股出現神秘大手非自動對盤成交後，股價即刻勁升。
遠東發展早市，出現兩手造0.95元，合共41球嘅非自動對盤成交，之後股價即刻抽上，最高見過1.19元，收1.12元，大升15.46%，成交金額1.55億元。
經紀黃話，受惠於CEPA同埋自由行嘅遠展，因為坐擁唔少三星級酒店，早前已經炒到飛起，噚日出現的非自動對盤大手成交，玄機係終於有芬佬肯大手接貨，產生金手指效應，即時令股價抽上。
多年以來，遠展股價久唔久就炒一次，但冇一次有今鋪咁強陣容，如果芬佬在咁高嘅水位都肯接貨，斷估唔會好似以前咁，兩三下手勢就炒完，問題係散戶對老虎仔信心有幾大而已。
至於遠東系其他成員如遠東科技（036）同遠東酒店（037），由於搞手唔同，所以不能相提並論。
慕容小初