荷李活型男畢彼特（BradPitt）雖然今年十二月就已經男人四十，不過佢嘅魅力依然非凡，佢仍然係影壇其中一位最有叫座力嘅男星。畢仔投身影壇十幾二十年，大大話話都拍咗幾十部作品，其中佢同導演大衞芬查（DavidFincher）合作嘅兩部電影《七宗罪》同《搏擊會》，都可算係佢嘅代表作。
最近就有人睇準figure熱潮，將畢仔喺呢兩部電影入面嘅造型設計成figure，而且像真度起碼有八成，所以首批五百個公仔一推出即刻售罄，𠵱家figure商重準備將公仔放喺網上度賣㖭，真係有生意頭腦。其中一個搞手對於佢哋設計嘅figure咁受歡迎就話：「我哋非常自豪，我唔知道畢仔有冇見過啲公仔，不過我肯定佢見到一定開心到飄飄然。」
其實睇番呢兩個figure，又真係做得幾神似，公仔嘅五官真係照足畢仔嘅面部特徵去做，好似《七宗罪》嗰個figure，除咗樣似之外，就連畢仔喺戲入面俾人打完貼嗰塊膠布都學埋，啲衫嘅質地亦都好講究，不過我就唔明點解《搏擊會》個figure件褸長咗咁多，呢個可以話係最美中不足嘅地方。