近日抱恙，想到如果不必戒酒戒辣，單睇電影就能醫病就好玩。美國賓夕凡尼亞州精神科醫生烏魯斯確實精於電影療法，以《辣手神探奪命槍》幫助慢性焦慮症病人，又試過以《獵鹿者》令精神失調的越戰老兵打開話匣子。（據我記得，飲酒亦曾經成功令失聲三十年的越南老兵開聲！）不過影迷要注意，喜劇原來對治療無甚價值，悲傷時看喜劇隨時鬧出反效果。
香港電影市道有復穌迹象，為特區經濟7-11操勞貌似患上老人慢三拍失憶症的董特首，千祈別看周星馳無厘頭電影。亡羊補牢，睇番套《香港有個荷里活》，夢想迪士尼之後，荷里活搬來香港發展，到時開放扯旗山改埋名做特區比華利山又點話。只要吸引到巨星落腳，特區星光熠熠，內地客慕名而至，旅遊消費以至物業市道大翻身，想窮都幾難。成龍經常公開唱好老董，後者睇《飛龍再生》，應該能減壓，不會有被噓妄想迫害症。老董已經斬掉身邊的「蟲」，批評者不可能再指龍為蟲，對他的評分馬上回升。分數升了，自信回來了，不再窒口窒舌，不怕被老婆搶風頭。而強悍打橫來的葉劉走了，老董不妨每日重看《我老婆係大佬》，對小男人大家長心理障礙肯定有啟發。老董病情屬輕，不必睇賓墟式大製作，睇晒差利舊作，召集董班子開腦震盪會議，齊齊模仿電影橋段嘗試食鞋滋味，精神療效成雙。