執笠舖位變大排長龍$58日式任食火鍋

「你最鍾意食咩菜式？」記者問。
「茶餐廳嘅牛腩麵。」梁師傅說。
原本這是一個平常不過的對答，但令人意外的是，這是由一位日本料理師傅嘅口中說出。
在黃大仙中心，最近一間以抵食招徠的食肆，成為區內少有的排隊食店，打破了日本菜喺區內做唔住嘅宿命。每晚將近六時，店外總見人頭湧湧，不少街坊都索性唔煮飯，拉大隊落嚟食番餐。
但偏偏在眾人忘形大吃之際，這裏的總廚卻告訴你，他對日本料理的另類睇法。

記者：李敏怡　攝影：黃子偉
Model：Yan、Jack（Sunspot）

日本料理諗好過食
「日本料理當中，你最喜歡吃甚麼？」記者問。
梁師傅先是靜了幾秒，然後說：「日本料理，我鍾意諗多啲。」
也不是做嗰行厭嗰行的原因，只是對於日本料理，師傅已經進化到另一個層次。「做日本菜，識同精係兩回事。當你深入鑽研日本菜時，你所關注的不再是單純的好味，而是要思考新的菜式、新的配搭。好似海膽不一定單獨上枱，原來配合其他魚生一樣好吃。又例如燒吞拿魚，唔一定燒至全熟，半生熟反而重好食。」原來煮嘢食不但要好味，重要講境界。

任食一樣要講心
「入行時只有十八歲，嗰時細個冇諗過要做呢行，不過諗住樣樣都試吓，估唔到一做就係二十年。」梁師傅說。
原來二十年前，梁師傅第一間工作的日本料理，也是以任食形式作賣點。因此，喺呢個任食「橫頭」，梁師傅可說是老行尊。今次梁師傅出任呢間日本料理店嘅總廚，其實是一個頗大的挑戰。店舖張經理話說喺佢哋之前，已先後有兩間日本料理曾在同一舖位開業，結果都是關門另覓戰地。吸取他人的經驗，這次他們出擊兩個月，已成為區內少有的排隊食店。「做師傅，無論喺邊度工作，一樣要講心。」可能就是這個原因令店舖能打破宿命，成為區內人氣食店。

■將近下午六時，門外已是人頭湧湧。

■以為做日本料理的，也一定喜歡吃，但總廚梁師傅卻讓你知道這個不是絕對的。

$58日式火鍋4款湯底選擇
任食火鍋雖然並非新鮮事，坊間亦有不少以此作招徠，但論食物質素卻較為參差。這裏的食物單講賣相已花了不少心思，而且食物種類不但有牛丸、墨丸、牛柏葉等一般打邊爐食物，重有每日清貨的河蝦同沙蜆，新鮮程度有保障。此外，還有富日本特色的三文魚骨，算是較特別的打邊爐食物。全部都是任食任叫，唔使再額外加錢。另外，湯底分別有豬骨湯、清湯、麵豉湯同泡菜湯四種選擇。雖然呢個平價火鍋有兩小時限制，但由於客人入坐前，所有食物已擺好晒，所以一般都可以輕輕鬆鬆在限時內吃完。

着數1：任食黑豚肉
肥牛
打邊爐點少得入口滑嫩的肥牛。這裏話明係日本料理店，所以連肥牛都有番咁上吓水準。牛肉嘅啲肥膏均勻地分布，肉質夠滑有彈性，一食落口就知道係新鮮。
黑豚肉
話明係日式火鍋，潮流最興嘅黑豚肉又點少得。黑豚肉比一般豬肉嫩，所以用嚟打邊爐亦唔怕煮到嚡。原本黑豚肉只是送一碟，但因為新開張益食客，所以𠵱家都做埋任食，是抵食之選。