一眾車迷期待已久嘅新一代福士Golf，終在日前正式亮相，新車除外形有所變動外，就連車廂布局及機械亦屬全新配搭，絕能予人耳目一新之感；不如今日就趁新車未正式抵港前，一齊嚟先睹為快啦！
由於新Golf車身尺碼有所增加，故此車廂空間亦較前有所增多，而車廂布局亦經廠方重新設計，不但予人耳目一新之感，兼且重會隨住三個不同版本（Trendline、Comfortline及Sportline），令設備配搭有所不同；另外，廠方不但強化新一代Golf嘅車架結構外，而且重於車內設有五套三點式安全帶、獨立頭枕及多達6個安全氣袋配搭，乘坐安全度亦因而提升不少呢！
至今已推出到第五代嘅新款福士Golf，造型擺脫一貫斯文作風，取而代之會係極富活力氣息嘅跑車化設計，除車身線條來得圓渾有致，匹配設計獨特嘅車頭泵把及一對頗有神氣嘅頭燈組合，望落份外吸引突出。
新車推出初期，廠方只會提供四台電油及柴油偈供用家選擇，當中電油偈包括有1.4公升（馬力75匹）及全新1.6FSI（馬力115匹）型號，而備受追捧嘅2.0公升引擎，亦會於稍後時間登場，馬力輸出更達150匹。然而，廠方為令新車可有更佳操控樂趣，部份型號更會備有6前速DSG半自動波箱，或Tiptronic半自動波箱，操控起來更見得心應手之餘，又富駕駛樂趣呢！