電盈嘅薄扶林豪宅盤貝沙灣，第一期話咁快全部賣清光，發展商今晚就同勞苦功高嘅四間代理行，喺金鐘港麗酒店擺設慶功宴，順道頒發四個「至威水」獎項，包括邊間代理行賣得最多單位，最多外籍客成交，單一最高成交金額，同埋單一促成最多宗數代理。
祝捷之餘，當然係部署第二期名為「貝沙灣南岸」嘅銷售攻勢。
聽電盈雲迪（顏金施）講，示範單位已經做得七七八八。早排電盈基建主席李智康親自喺歐洲搜羅唔少珍品，諗住擺喺示範單位，聞說，今個中秋佳節，就可以一睹呢個將令市場嘩然嘅示範單位。
蘭西記得個盤第一期開賣嘅時候，正係西方嘅情人節，電盈重喺當晚搞咗個情人節之夜，邀請一眾貴賓出席，盛況空前。今次第二期展開攻勢，就揀意味人月兩團圓嘅中秋佳節，睇嚟都唔嘢小。
近期新盤記者會又多番，好似噚日咁，就有成十一單。不過細心睇吓，發覺好多都係由代理出面，發展商到時現身。
蘭西聽聞原來係發展商要求代理咁做嘅，所以就出現一間代理行一日有三單記者會，連代理都感到無奈。咁即係經紀除咗推銷，重要做埋公關啦。
桂洪地產喺山頂嘅豪宅堪仕達道1號，最近落成入伙，物業交畀置邦物業管理。個盤只有十二個單位，設有會所，包括泳池、健身室、日光浴場、兒童遊樂場同園林花園。
堪仕達道1號單位面積一律二千八百二十八方呎，早前發展商放租叫價全包月租九萬蚊，呎租約三十一個八，市傳已租出兩伙。
自由行最大嘅得益者非零售業莫屬，所以唔少零售商都趁機開分店，大做呢類客嘅生意。紅磡一向係內地客買珠寶玉石同金飾嘅地區，啱啱喺七月上市嘅化妝品銷售商卓悅控股，都揀咗呢度落腳，租咗民裕街五十一號地下G舖，屬大單邊位。
造成呢單租務嘅利嘉閣測量行店舖部高級營業董事翁鎮滿講，舖位面積四千五百方呎，月租八萬蚊，呎租十七個八。
講起紅磡區，梗係唔可以唔提恒豐金業啦，佢個「足金坐廁」，連西班牙足球勁旅皇家馬德里嘅朗拿度都要去參觀。𠵱家再加埋卓悅化妝，簡直係旅客必到之地。卓悅控股主席葉俊亨揀呢度開分店，果然夠精明。
中央放寬自由行限制，港商紛紛諗計，吸納呢股湧嚟嘅資金，中原同屬下嘅中原中國，合作搞「睇樓自遊行」，喺內地設立「香港房地產推廣站」，以嶄新概念為內地客全面提供有關香港房地產市場諮詢服務。
第一個「香港房地產推廣站」已喺深圳成立，今日搞開幕，中原地產高層好似董事總經理黃偉雄、執行董事陳永傑同張奕威都會出席。
睇嚟兩大代理集團好快又要展開另一條新戰線。
中國人每有喜慶，傳統愛舞龍醒獅一番，美聯獲北京UHN國際村住宅項目獨家代理，為此特意喺舉行記者會嘅紅磡海逸酒店內，安排醒獅表演。代理通常都係開年先會搞醒獅，為咗一個樓盤咁做，都相當少見兼大陣仗。
噚日開記者會前，六、七名龍虎武師，打鑼打鼓同舞獅，現場氣氛十分熱鬧。據講今次美聯因為有熟人介紹，埋單只係份屬「友情價」。
蘭西
電郵地址：
