鍾楚紅自從嫁咗畀廣告英才朱家鼎之後就從此息影，不過偶然都會拍吓廣告搵啲外快。噚日有報道話佢會復出拍成龍套《新警察故事》，重做龍嫂一角，馮仁昭打畀紅姑求證吓，佢話：「唔知邊個放呢啲流料出嚟，我根本冇接到呢部戲，成龍公司係搵過我拍呢部戲，但我第一時間已經話唔拍，唔明點解重會有人喺度亂講。」
紅姑話𠵱家過緊幸福嘅婚姻生活，拍戲咁辛苦嘅工作佢就唔想再做啦！佢重話：「我𠵱家嘅生活圈子已經唔涉及娛樂圈嘅人同事，所以我覺得好平靜，得閒學吓其他嘢！生活都幾充實，但今日傳出話我東山復出，搞到好多人call我，破壞我嘅平靜生活，我就覺得好煩。」
成龍套新片《飛龍再生》雖然喺美國票房麻麻，不過都冇影響佢心情。前日佢就去咗美國賭城拉斯維加斯，出席一個大型綜合展銷會，推銷佢嘅最新便服品牌「JCJeans」。其實「JCJeans」呢個名係成龍英文名嘅縮寫，主攻便服、運動服同牛仔系列。前日佢除咗着住自己品牌嘅衫現身時裝展，之後重拋新裝落台益觀眾，搞到個個爭住攞。
劉德華日前接受商台節目訪問，佢話今個月積極咁進行地獄式訓練，為將會喺十月開拍、由張藝謀執導嘅古裝武俠新片，作好準備工作。華仔每日練功三小時，當中重用咗兩小時嚟拉筋，當正係真正嘅運動員咁訓練。而十月係華仔父母嘅結婚五十周年紀念，華仔話希望可以為父母安排再次度蜜月。
甄妮噚日分別接受由家燕姐主持嘅《家天下》同查小欣嘅《茶煲裏的查篤撑》電話訪問，甄妮就情變事件接受家燕姐訪問時，就表示重未同男友阿Jeff分手，但係之後接受查小欣訪問時就前言不對後語，直認同男友分手嘅始末，今次真係連家燕姐都冇面畀喎！甄妮亦表示十一月嘅演唱會唔係取消，只係想有多啲時間準備至延遲到下年五月先舉行。
陳煒噚日喺南華會出席亞視《歐洲聯賽冠軍盃》宣傳，佢話之前試音成功，遲啲會唱劇集《醫神》嘅插曲，問到佢同亞視續約問題男友有冇畀意見，佢話：「佢話『你開嘅條件亞視都畀到，咁梗係簽喇！』咁亞視畀我嘅條件都好滿意，公司只係希望我可以連經理人合約都簽埋畀佢哋。」
