肥仔K自美國回港放暑假，星期六日碰啱舅父外公外婆成家人與同學等去澳門度周末，於是一齊去。到咗澳門街，食到興高采烈，不在話下，葡國陸軍俱樂部啲葡國菜好精采，一餐午飯食咗兩個半鐘頭，直至到侍應話：「廚房甜品賣晒」，先至肯走。
食完飯先知道已經掛起一號風球，但天朗氣清，當風球冇到啦，繼續行街，第二朝8月24日，午茶時候，風雨突至，肥仔K阿媽因為要趕返香港與老師食晚飯，驚住風球有阻滯，立即帶肥仔K趕去碼頭，想話standby提早登船，點知條人龍好長好長，K媽立即轉軚，補106蚊去換一張四點半嘅豪華客位船飛，等到四點九卒之開航。澳門水域內隻船如坐過山車，拋完又拋。K媽高聲尖叫，好彩冇乜事，一啲同船細路就嘔吐大作矣。
驚魂甫定，K媽記得成班細佬妹、外甥與父母要搭原定嘅五點半船，於是立即打電話叫佢哋唔好上船，但成班人已經入咗閘，唔想變卦，於是作罷。晚上六點鐘出到中環趕赴約會去了。
大件事咯，呢班五點半船開咗二十分鐘，就俾風浪打到噴射引擎失靈，成隻船在水上冇咗動力，隨波飄流，傾完左又傾右，乘客無不面青口唇白，白過海上啲巨大浪花，船長一於死頂，用後備引擎啟動，慢慢行，卒之行咗一個半鐘頭，晚上七點到達港澳碼頭，肥仔K阿婆已經手腳冰凍需猛搽白花油。
澳門歡樂遊竟碰上怒海驚魂，一家十幾口由老到嫩，無不嚇餐死，唔怪得唐翔千與唐英年要分開飛機坐。