美股繼續呆滯，港股雖有游資支持，一度直叩10800，不過荷銀話中國可能進一步收緊銀根，令國內投資意欲降溫，金融市場投資風險上升，投資者減持或轉趨觀望將在所難免，恒指午市掉頭下跌，收報10678，跌75點，成交縮至116億元。
短期內，市場游資會否持續流入，實在令阿虎擔心。港股唔算特別平，如果欠缺游資動力，後市肯定唔慌好，話唔定淡友會趁今日期指結算大舉造淡，出現好淡龍虎鬥。市場咁啱又傳出中電信（728）會獲發3G牌，消息擺明係想玩殘中移動（941）與聯通（762），睇嚟都係淡友佔上風。
電盈（008）最近消息多，繼提出每股3.5仙私有化合縱連網（8107）後，最近又傳出有美資基金狂掃佢個貝沙灣。早前有美資斥資7000萬元買入貝沙灣一期最後3個空中花園，令一期售罄。現時又傳話有美資斥3.6億掃起二期50個單位。
黑客話，據聞美資吼準香港可能成為各國科技公司進軍中國市場第一站，睇好數碼港住宅單位租售前景。不過，電盈噚日仍跌3.23%，收4.50元。
和黃（013）以每股0.58元，增持3億股和記港陸（715），即總代價1.74億元，和黃持股量升至62%。市場隨即憧憬和記港陸會被私有化，因為和記港陸與和黃有大量關連交易，唔少生意都係來自和黃，將佢私有化可避免唔少利益衝突問題。由於和黃將在全球推出3G服務，相信重有好多相關物料合約要批畀和記港陸。
阿虎