有份主演恐怖片《咒怨》嘅性感靚女市川由衣，拍完酒井法子擔正嘅《咒怨２》之後，又可以輕鬆唞一唞，去到水清沙幼嘅沖繩放大假，順便幫日本雜誌拍寫真賺外快，真係一舉兩得。
市川今次去沖繩影靚相，可謂不愁寂寞，除咗有經理人同攝影師同行之外，重有個逗得佢好開心嘅同伴，就係一歲半大嘅狗仔Tsubaki。雖然Tsubaki唔係市川嘅愛犬，只係幫呢輯寫真做吓臨記，但佢好精乖伶俐，同市川姐姐一齊對住鏡頭影相亦唔會扭計。
Tsubaki真係好盞鬼，當市川着條吊帶裙趴喺海灘影相嗰陣，佢就好乖咁企定定畀佢摸個頭，而Tsubaki嘅視線亦一直望實市川，十足小情人！
同Tsubaki過晒電嘅市川話，估唔到隻狗仔同佢一樣好鍾意食沖繩特產嘅苦瓜喎，重好想收養佢㖭。不過我羅拉就覺得冇咗隻狗喺身邊，市川着住低胸性感裝抱公仔影寫真，更加冧掂班麻甩fans。