倪震將為商台做節目，早年曾主持港台節目的他，前晚批評港台高層不尊重人才，而商台名嘴鄭經翰昨日亦炮轟陳百祥主持的港台節目收聽率欠佳。
倪震前晚在尖沙嘴出席商台四十四周年台慶晚宴，他表示下月中會為商台開咪主持talkshow節目。早年倪震曾為港台主持節目《三個寂寞的心》，但他前晚大肆抨擊港台管理層的工作態度。
倪震說：「我九八年幫商台做過三個月DJ，我哋合作愉快。商台培育人才，亦尊重人才，我哋一向有聯絡，港台同新城方面，我認識嘅朋友就少啲。」被問到是否因當日合作不愉快而不選擇再為港台效力時，倪震說：「唔係，我喺港台做得幾成功，但管理人員感覺好似益你，唔會感激你做咗好節目，商台就啱啱相反，我好鍾意商台。」提到會否請女友周慧敏做嘉賓，倪震說：「有價值都會歡迎佢上嚟。」
周慧敏前緋聞男友兼前港台DJ黃凱芹，昨日出席港台活動，對於倪震的批評，黃凱芹說：「係觀點同角度嘅問題，睇吓心目中尊重嘅意思係乜，喺港台唔好期望，大家形式唔同，好多嘉賓主持係為興趣。」
此外，最近鄭經翰與查小欣於商台節目中，批評陳百祥上周擔任港姐司儀時的衣着品味，掀起一場罵戰。昨日鄭大班於商台節目《風波裡的茶杯》中說：「有啲膚淺嘅問題我想回應吓。我哋係電台節目主持人，唔可以同電視台節目主持人比嘅，大家係講收聽同收視率，但係如果講做電台，呢位叻哥呢，全世界最叻佢㗎啦，咁佢做電台節目《開心日報》嘅收聽率，一定比查小欣節目差好遠，呢個係事實。」
對於阿叻穿泳褲一事，鄭大班說：「我𠵱家就保障阿叻嘅權利，一個電視台容許一個人以咁低俗嘅服裝出現，呢個係電視台嘅問題，係觀眾嘅選擇問題，冇嘢值得投訴。」
香港電台一台節目總監周偉材昨日對此說：「港台舊年搵咗ACNelson做市場調查，《開心日報》入咗十大最受歡迎節目，阿叻舊年已加入主持，我唔知佢（鄭經翰）根據乜嘢咁講，佢係咪自己做調查咋？」至於倪震的指摘，港台二台節目總監李再唐則說：「港台處理呢類創作節目，通常畀好高自由度主持，或者有時有大嘅創作空間同自由，佢哋就覺得冇人理。」
採訪、攝影：駱華齡
