雖然噚日唔少股份繼續升，但小初同埋好多朋友開始陸續食胡，皆因覺得好多股份已經到價。
好似經紀黃咁，噚日打電話畀小初，話已經趁高沽出坐咗一段時間嘅創維數碼（751）。
創維噚日突然勁升13%，收1.30元，創下一年高位，成交股數大增至1.26億股，金額高達1.57億元。
經紀黃話，上個月創維曾出現一啲大手非自動對盤成交，造價每股1元，據講係有芬佬接貨，收尾佢哋再喺市場上掃入，家陣買齊貨，隻股自然上升，股價或者可以再放多陣煙花，但現時市況似乎唔多就，所以收割咗先算。
另外，喺3元水平打橫行咗好耐嘅港基國際銀行（636），噚日突然成交急增，股價衝上去3.30元收市，大升6.45%。
小初起初以為係中銀香港（2388）升咗唔少，所以港基亦追落後，但經紀黃話唔係，因為市埸傳出港基賣盤一事已有着落，而且聽聞收購價唔錯，所以隻股突然抽上。
慕容小初