中原助理營業董事譚桂貞講，一名移民英國十幾年嘅香港人，最近返港探親，一家人重齊齊去睇樓，原本諗住買個大單位一齊住，但最後唔係面積太細，就係價錢太貴。後嚟喺將軍澳區經中原睇咗一輪樓，見到南豐嘅將軍澳廣場一千零二十六方呎三房單位，有工人房重連車位，三間夾埋都係八百零萬，合晒要求，所以返屋企商量咗兩個鐘就扑鎚，買咗一座三個上下相連嘅B單位。
喺港島區住嘅大家姐就住高層，喺英國返嚟嘅二家姐就住中間一層，剛滿十八歲嘅細妹同媽咪就住最下面嗰層，據聞佢哋係一次過畀晒錢㖭。聽講佢哋嘅媽咪一直都住喺將軍澳居屋。
呢三姊妹舊年曾透過中原，睇過鰂魚涌太古城，但因價錢唔啱冇買到，今年竟然一買就三間，原來又同自由行有關，因為覺得中央支持香港，先至會搞啲咁有利本港嘅政策，等經濟有轉機，所以夠膽放心入市。
西九龍唔少住宅供應，想突圍而出，當然要有噱頭。長實同新地嘅長沙灣宇晴軒，有全港首個私人屋苑人造浪泳池，都算獨特。呢類玩意，以前喺海洋公園水上樂園至有得玩，私人樓就屬第一個。聽長實講，戶外泳池有成九十米，連接室內泳池之間，重整咗個水晶貝殼概念嘅天幕（圖二），好似水晶宮咁。裏面重有部二百吋大銀幕電視，可邊游水邊睇電視，重可睇星星。成個會所二十萬呎，耗資二億興建。
都市人生活緊張，閒時都應做適量運動，輕鬆一吓。太古地產高級營業經理馬淑貞，就選擇耍太極。噚日佢講解鰂魚涌逸樺園會所設施，提及有太極台時，向蘭西透露，已學咗太極一段時間，上咗八堂，話呢種運動消耗唔少體力，唔簡單㗎。
蘭西
電郵地址：