經紀黃同小初講起佢3隻心愛鞋股，就係裕元集團（551）、信星集團（1170）同埋新灃集團（1223），原來佢幾乎全部沽晒咁滯。
經紀黃話，雖然新灃噚日公布中期業績好靚仔，兼夾就嚟拆細，有短炒機會，但股價𠵱家已去到10元樓上，真係乜嘢好消息同基本因素都反映晒，加上帳面已經賺咗咁多，所以食胡計數。佢重話，家陣隻股投機味太重，唔啱佢胃口喎。新灃噚日再升5.13%，收10.25元。
另外，經紀陳向小初推介泰山集團（1192），佢話隻股自從去年賣殼之後，已經由成衣股轉型至石油貿易、油產品運輸和提供海上浮動油庫。去年全年業績已經由虧轉盈，噚日公布嘅中期業績繼續有改善，相當靚仔，半年盈利已經有4125萬元。
泰山嘅股價雖然近排亦有跟同大市上升，但始終成交唔夠大，好似話公司去年以每股0.27元配股，接咗貨嘅捧埸客至今仍然坐住，有關人等好想股價做得好睇啲，所以不妨留意吓。
慕容小初