人嚇人，絕對不會嚇死人，這是一身《姊魅情深》造型的Yan與Erica說的。
兩日前，兩位美少女「肆虐」旺角百老匯戲院，一身血衣加恐怖化妝，四出嚇人。沒嚇死人，只嚇得人醜態畢露，儀態盡失，玩後有感，自封「嚇鬼兩姊妹」的她們說：「人嚇人，原來好過癮！」
記者：陳漢榮 攝影：陳智良
化妝：BridalImage 模特兒：Yan、Erica
兩美少女未試過被嚇，亦無嚇人經驗，要嚇人，不知從何入手。化妝時間，開會，Erica提意見：「點都要化個死人樣先，眼角、口角加兩滴血，造型呢？」Yan拍手叫好：「就抄《姊魅情深》嗰兩姊妹，成件睡袍都係血。」「地點呢？」「旺角百老匯戲院。」「點解？」「多人睇戲囉。」只三兩句說話，有結論。
「位置呢，點嚇呀？」這是攝影師的提問，二人隨口答：「玩到邊嚇到邊，攝影哥哥你跟住我哋『嚇鬼兩姊妹』，一定有相交差。」
入口乃必經之路，位置選擇絕對正確，「兩姊妹」藏身戲院入口帳幔內，事前說好，每有人入場，第一時間閃身而出，鬼聲鬼氣大嗌：「你買咗飛未呀？」
Yan：「斷估有女仔睇戲中途去Toilet啩。」事前布局，攝影師藏身防煙門後，「兩姊妹」蹲身樓梯轉角處，有人出現，即飛撲大嗌：「女廁喺樓下呀！」
Erica：「無理由唔玩埋男仔。」「兩姊妹」與攝影師藏身同一廁格，聽到鄰格有人如廁，即出門從後大拍膊頭，嚇死人沒命賠。
「兩姊妹」蹲身收銀機下，老早給人發現，Yan嫌無癮，打算鳴金收兵：「黃晒，玩唔成嘞！」Erica玩得興起，遠看有一白衣少男氣喘喘奔來，即說：「玩埋呢次，我估佢唔知我哋喺度。」
「兩姊妹」意猶未盡，嚷着繼續靠嚇，今次選擇在熱鬧的旺角街頭，見有不為意的途人經過，即吊尾跟隨，然後高速貼近，從後尖叫：「我哋靚唔靚女呀？」結果多人中伏，雞飛狗走。
「撞鬼」實錄
「唔知算唔算人嚇人呢？」剛被「兩姊妹」嚇得爆穀滿天飛的Chris某次醉酒，乘往大埔粉嶺的通宵小巴歸家，上車，就選擇車尾單邊位，貪一個人坐，可以開窗吹吹風，散散酒氣：「太醉嘞，長途車，不知不覺就瞓着咗，瞓瞓吓，覺得後頸好痕，好似有人用手指輕輕摸我咁，跟住耳仔又痕，重Feel到濕濕哋，我當堂醒一醒，望下車廂，得番我一個人，嗰時好驚，但又唔敢擰轉頭望喎。」
一個急煞車，背後生風，一個頭顱狀物體竟從後滾來，嚇得Chris尖叫：「披頭散髮，嚇到我大嗌，司機又俾我嘅大嗌嚇到停車囉。」望真，原來是地拖頭，難怪弄得後頸又濕又痕：「嗰次真係驚到想瀨尿㗎，夜麻麻有個人頭飛落你身邊喎，我諗都算做人嚇人啩，多得個司機囉，擺支爛地拖喺車尾！」
「嗰次我嚇到喊出嚟呀！」讀中六的阿敏，今個暑期與一班同學到離島宿營，入夜，男生講鬼古，女生又要驚又要聽：「個天行雷閃電，氣氛已經好恐怖，重要閂埋房門熄晒燈圍埋床講鬼古，玩嘢咩？」其中一男生說：「你哋知唔知呀，每逢落雨天，通常出現嘅都係白衣女鬼。」
透過窗口，向露台一瞥，不對勁，阿敏登時面青：「鬼……白衣女鬼……」眾人循她視線一望，果見露台凌空懸浮着一件差不多透明的睡袍，隨風飄揚，睡袍底下一雙白皙的小腿，若隱若現。
眾人嚇得不知所措之際，睡袍消失，之後是一連串的敲門聲：「我同幾個女同學即時嚇到喊！」進來的是另一女生，手持即棄即用雨褸，她光着腳問：「你哋喊乜？」恍然大悟，那「睡袍」只是雨褸，女生只是在露台晾乾雨褸吧了。
