近期新聞焦點係自由行，本報曾提及好多內地居民來港，都係買金飾為主，加上時近中秋，應節貨品亦陸續出籠，有聰明嘅生意人就將兩者掛鈎。
八方噚日收到翠亨邨嘅新聞稿，佢哋推出一款「七星伴金月」豪華禮盒，內有一個純金月餅，配以七個金箔蛋黃蓮蓉月餅，說明「可供內地旅客商務送禮或自用」。呢招向內地居民推廣應節手信，確屬花心思。
八方同喺翠亨邨做嘢嘅朋友傾起，原來佢哋舊年經已有推出呢款純金月餅，但冇做廣泛宣傳，最後只係賣出十幾套，今年就因為管理層對自由行抱有寄望，希望可以增加一倍銷量。
不過，呢套賣$3,888嘅禮盒，個純金月餅其實淨重僅四錢，以噚日飾金價計算，價值$1,480，加埋七個靚月餅，成本最多咪二千蚊有找，咁利潤咪可能達五成以上？好多大豪客鍾意唔貴唔買，或者呢款「豪華」禮盒都會受歡迎嘅。
傳真︰2623-9278
電郵︰