曾志偉、陳百祥、黃日華、張兆輝一班明星足球隊成員，前幾日喺鄭州同中國女子足球隊踢咗場友誼賽，二比二打成平手，最後要踢十二碼分勝負，結果女足勝出。明星隊輸得慘，事關張兆輝勇戰受傷，整傷咗膝頭十字韌帶，傷勢都幾嚴重，要坐輪椅去醫院治傷。
明星隊經常出埠比賽，但今次就麻煩多多。比賽喺星期日舉行，大隊上星期六就出發，而志偉同阿叻因為要做港姐決賽司儀，所以比賽當日至起行，撞正打風，佢哋去到鄭州個記者會已經做完，成個記招就得黃日華一個撐場。其他人就去咗少林寺玩，但因為遇到整路，搞到臨開賽前先去到球場，差啲連波都踢唔成。
成奎安（大儍）就喺上海飛去鄭州，但又因為航機問題，賽事打咗半場先到，諗住冇機會落場，點知張兆輝救波時過勇整傷膝頭韌帶，傷得幾重，咁大儍就即刻頂咗張兆輝個位。雖然場比賽一波三折，不過志偉話好享受場賽事，希望女子隊去打世界盃時有好成績喎。
曾經參與過無綫《小男人周記》等劇集演出嘅男藝人姑媽（真名周匡朝，），大前日因為癌症不幸病逝，姑媽生前同唔少天皇巨星相熟，好似劉嘉玲、梁朝偉、白雪仙以及已故嘅張國榮等等，而姑媽唔單止係仙姐嘅好朋友，而且重係仙姐嘅麻雀腳㖭，𠵱家又有一位好朋友離開，相信仙姐一定好難受。
莫文蔚喺呢個星期五就會推出佢嘅全新國語大碟「X」，唱片公司特別幫佢隻唱片做咗個全透明嘅包裝，記者會重會喺泳池度舉行。莫文蔚有隻新歌叫「愛死你」，問到點先係愛死你嘅表現？莫文蔚話：「我記得讀書嘅時候，同個德國男仔拍拖，我為咗佢學德文，都係愛死你嘅表現。」
憑主演《開朗少女》而人氣急升嘅韓國女星張娜拉，前日去到台灣西門町舉行握手會，雖然fans將現場擠得水洩不通，但係張娜拉都表現得好親切，一一同佢哋握手。呢位韓國美少女去到台灣就真係「吃盡苦頭」，除咗語言不通外，就連台灣嘅飲食都唔多習慣，飲咗台灣大受歡迎嘅無糖綠茶後，即刻皺晒眉頭，小妮子今次去到台灣重唔係擺明「吃苦」咩？
張衛健（Dicky）噚日去有線娛樂台接受吳君如訪問，記者原本想搵佢做訪問，但唔知乜原因，Dicky一見記者就面露不悅。其後君如到場，𠱁番Dicky笑，先畀記者影相。Dicky透露𠵱家已經過咗結婚嘅衝動期，亦都冇打算生細路仔，就算要都只會領養，佢又話希望可成為東南亞電視一哥，呢個係佢喺事業上嘅野心喎。
