羅馬前日友賽貝迪斯（最後和二比二）前，隊長托迪重坐住架車進場兼繞場，夠晒派頭；殊不知佢到比賽時俾人撞親「八月十五」，狼狽不堪，結果又要車送離場──不過係救護車啫，真係唔慌唔型囉。
呢場波係羅馬大軍今季首次喺主場同球迷見面，托迪開波前向球迷揮手兼單晒眼「放電」，踢到咁上下重有意無意揭起件衫騷腹肌，真係「英」到痹。點知客軍卡比唔識做，同托迪搶波博得滯，搞到呀王子撞親臀部同大腿位置，據報話呢一撞可能令托迪休戰一至兩星期。由於托迪喺開鑼戰對烏甸尼斯本來就停賽，呢次受傷對球會影響唔大，但佢可能踢唔到下月初意大利對威爾斯場歐國盃外圍賽生死戰就大件事。
據西班牙傳媒講，皇家馬德里已經準備將中鋒摩連迪斯賣去德甲史浩克04，據講兩會已經傾掂數，𠵱家只係差摩連迪斯首肯。史浩克04今季班前鋒好唔掂，以摩連迪斯嘅質素唔休無用武之地。即管睇吓佢想留響皇馬做大後備，抑或去史浩克04做大佬啦。
幾乎被人遺忘嘅贊卡，前兩日大聲疾呼話重想為德國國家隊效命，而佢亦心知加盟烏甸尼斯後只省入過一粒，證明意甲聯根本唔啱佢，於是話想返祖家發展喎。雖然利華古遜有意收留呢個發霉中鋒，但都唔敢太冒險，想向烏甸借贊卡一季至再決定買唔買斷，擺明有戒心。
意乙聯要傾掂數至開到波，不過就益咗意大利國內賭客。平時要中意大利波足彩，通常要吼中十幾場勝負，但今季首輪意乙踢唔成，按例各場當照串中，只要吼中首關費倫天拿意大利盃贏普拉托（結果費隊勝二比○）就中彩。據報超過五萬人分彩池，雖然利錢唔慌多，但總算過吓中彩癮。
噚日美國夢幻隊對加拿大場波好奇怪，加拿大喺領先第一節後，竟無端端收起主將尼殊，搞到最後倒輸成四十分！其實加拿大咁做喺同賽程有關，佢哋今朝十點要對巴西，跟住唞唔夠一日，喺周四清晨兩點半又要對多明尼加共和國，唔怪得要收兵留力喇，橫掂頭三名都出線囉！