人民銀行日前至話要提高存款儲備金比率至7%，變相凍結1500億元人民幣，收緊國內信貸，而話口未完，外管局又話要查銀行數，睇吓有冇銀行違規售滙。
呢兩項動作有少少令阿虎諗起10年前國內的宏觀調控措施，今次唔知會否好似當年咁將留港游資抽回國內，跟住就嚴打違規挪用國家資產嘅中資企業，再次搞到金融市場風聲鶴唳呢？
睇嚟大家對CEPA及自由行的樂觀情緒要收斂吓，國企股噚日持續遭拋售，中石化（386）再跌6.6%，收報2.125元；中石油（857）跌1%，收報2.475元，成交5.7億元。國企指數則再挫1.77%，收3102。噚日連地產股亦見回吐，好淡爭持頗激烈，恒指收10753，只跌10點，成交仍有128.49億元。
新怡（1094）大股東繼續沽貨，股價一度再跌10%，低見0.315元，但其後沽盤收斂，跌幅收窄至2.85%，收報0.34元。大股東話明每股0.17元都肯賣，何解重有人肯在0.30元以上接貨呢？黑客話，接貨者身份絕對唔簡單，據講此股早被證監會盯住，有乜差池隨時會停牌。大股東睇嚟會繼續減持，有貨者要小心。
德發（928）大股東亦玩減持，出售12%畀基金客。據聞幕後人原本計劃配股後開車炒上，不過市場氣氛逆轉，噚日股價一度挫逾10%，最後跌幅收窄至2.4%，收0.81元。如果國企股企穩，或者可以幫德發造好。
阿虎