公屋租戶嘅租金，不盡相同，因為有啲戶口住大單位向海，一啲住細單位近垃圾房，所以交租唔會一樣嘅，彼此有（一）入息唔同，（二）租金唔同，所以租金與入息比例亦唔多同。
以昨日舉嘅五個住戶為例子，（一）入息九千，租金千五，比例係16.6%，（二）入息八千，租金千二，比例15%，（三）入息七千，租金一千，比例14.3%，（四）入息六千，租金八百，比例13.3%，（五）入息五千，租金五百，比例10%。排列好之後，「租金與入息」比例嘅中位數就係14.3%，14.3%就係昨日講嘅MRIR。五個住戶就易排列啫，當你有五十幾萬租戶嘅時候，搵呢個中位數就頭痛咯。即使有電腦幫忙，都唔會一㩒掣就走出嚟。政府統計處定期進行「綜合住戶統計調查」，每季抽樣訪問二萬一千戶，其中約七千戶係公屋住戶，喺樣本之中搵到「租金與入息比例」Rent-to-IncomeRatio，再將呢個比例從大至小排列，中間嘅數值，就當係全體租戶嘅「租金與入息比例中位數」（MRIR）。雖然明知逐戶（五十幾萬戶）搵比例，辛苦非常，但訪問七千戶做樣本，中位數嘅準確性高唔高呢？城大劉國裕副教授話有疑問喎。
法官話MRIR按法例，不可高於10%，直接效果就係全部公屋租戶嘅租金都要調整，房委會損失慘重，亦都鼓勵所有人都申請大單位（因為五千元入息交租一成），用五百蚊住大單位，抵到爛！