大市先跌後穩，恒指只係唔見10點，期指則有進帳20點，變成高水21點。國企指數再跌，但跌幅已經收窄，睇嚟個市仍然係欲罷不能，並且會由個別重磅嘢帶動。
是日帶動大市嘅係中銀（2388），收9.90元，升35仙。中銀Call輪自然隻隻彈起，龍虎榜10大有6件係中銀Call輪。最勁係9794，30球易手，由1.24元飛上1.78元，升幅44%。隻輪係1份兌1股正股，正股升35仙，通常就算跟足隻輪都只係升35仙，𠵱家升夠54仙，升到突晒，若然中銀唔係有嘢跟尾，則隻輪已經過晒火位。睇數據，亦唔見得吸引，10月底到期，溢價2.6%，槓桿率5.6倍。
中銀下月5日派中期成績表，10月底前應該一定已經除中期息，計埋股息因素，9794溢價實際可能係4.3%以上，咁嘅溢價，好難撐落去，隻輪買唔過。
滙豐（005）收99.75元，跌1格。除息之後已整固一輪，加上中銀咁勁，滙豐都怕有機會上番去。滙豐Call輪小敲搵食對象，短炒可揀9845，12月到期，現價67仙，溢價2%，槓桿率14.9倍。溢價唔離譜，槓桿率大，夠晒爆炸力。想實際，最好係揀9836，明年2月夠鐘，輪價1.14元，溢價0.5%，槓桿率8.8倍。咁長嘅壽命，槓桿率又唔低，到期之前正股又冇股息派發，幾乎平水乃係抵食之選。
章盛