「呢種普洱茶葉，又叫女兒茶，100克價值港幣16萬！」Charles介紹嘅係其鎮店之寶──清朝宮廷普洱茶葉，原來茶葉都可以分年份，重可以咁值錢；Charles最愛研究茶藝研究茶葉飲靚茶，一年前開咗呢間茶館，為咗保證茶葉質素，一年內親自去咗幾次武夷山、安徽、台灣試茶兼入貨，更自創茶葉點心，開班教茶藝，帶團採茶製茶……原來，飲茶都可以咁講究。
記者：馬慶武 攝影：伍慶泉
逢星期一至三、五出版
Charles話每個愛飲茶嘅人，一定係由一口好茶開始，當佢十幾歲嘅時候，香港有一種飲茶嘅地方叫茶皇廳，當時飲茶嘅茶樓最頂一層會提供比較靚比較高質嘅茶葉供茶客飲用，呢一層就叫茶皇廳喇。而Charles嘅第一口好茶就係喺某茶皇廳飲到：「不過當時太細，都唔記得飲嘅係邊隻茶。」就由嗰一刻開始，Charles就對茶產生興趣，先係搜集茶壺及茶藝用具，之後就開始研究茶葉，到5年前，Charles更為學茶藝及參觀茶葉廠而常到台灣、中國旅行。兩年多前，因為之前嘅地產工作合約期滿，就決定一嘗開茶館嘅心願喇。
中國由周朝開始已經有文字記載用茶葉泡茶，而中國、台灣亦一早流行茶館泡茶呢種風氣，但係唯獨香港只有少數人對飲茶有深入研究、用正統方法泡茶。「曾經聽過有台灣人叫香港人做『普洱文盲』。原因係香港人去飲茶好多人都會叫普洱，但係飲嗰隻普洱係喺邊度嚟，係邊一種就完全唔知。」Charles話決定開班教茶，都係因為唔想香港咁多「普洱文盲」。
呢隻就係全店最貴嘅清朝宮廷普洱茶葉，超過100年歷史，極矜貴，據講飲一啖之後，茶香可以喺口腔內停留極長時間。係上年11月內地茶葉投標，投得嘅貨主喺Charles極力要求下讓咗少許（約二斤）畀佢。
呢款點心沒用上茶葉當材料，亦都無獨特嘅茶香味，不過一樣適合一邊食一邊飲茶。用番薯包着蓮茸嘅地瓜餅，煎香後熱辣辣，味道香甜。而叫茶農地瓜餅係因為古時嘅茶農非常貧窮，所以只會食唔值錢嘅番薯（地瓜）。
餡料係混入觀音茶葉嘅豬肉，再加上瑤柱，清香味道四溢，最適合配上觀音茶，更能感受觀音茶香。
餐牌上唯一凍甜品，大菜糕中有好多新鮮桂花茶葉，入口除咗有冰凉感覺外，強勁桂花香味充滿口腔，夏天必試之選。
電話：23684782
地址：尖沙嘴金馬倫道15號1樓
營業時間：中午12時至晚上11時，逢星期一休息。
