林家棟小時居於九龍城寨，回想當年挽水桶落街裝水、穿膠花和珠仔的日子，至今仍印象難忘。原來家棟十二歲時為了買adidas波鞋而開始做童工，在餐廳送外賣。
林家棟家有八兄弟姊妹，自小雙親離異，但隨母生活的他十分懂性。家棟在家中排行第七，有六個姊姊、一個弟弟，對於當年居於九龍城寨，家棟表示那種克勤克儉的日子，到現在仍很難忘。
日前家棟在尖沙嘴接受訪問時說：「嗰時住城寨好開心㗎，城寨好多時冇水供應，我哋就要攞住個水桶落街裝水，咁細路仔實會玩水，可以促進大家感情，重有穿珠仔、穿膠花啦，呢啲回憶都好開心。」
不過家棟承認因自己在單親家庭中成長，令他對婚姻採慎重態度，他說：「嗰時阿爸阿媽分開咗，自己重係細，就算你問啲大人發生乜嘢問題，佢哋都唔會答你，但佢哋分開多多少少會影響我對婚姻嘅睇法，一齊組織家庭喎，真係要諗清楚。」
由於家棟媽咪要母兼父職，所以懂事的家棟從小就知慳識儉，他表示以前為了買adidas波鞋，決定自力更生，十二歲那年就開始做童工，在油麻地果欄附近的一間餐廳做外賣仔。
家棟說：「可惜因為做嘢而斷送自己嘅學業，雖然都有讀到中學畢業，但成績就唔算太好，嗰時我喺餐廳做兼職外賣仔，成日都倒瀉嘢嘅，好彩老闆對我都好好。我後來都有幫林百欣打過工，喺長沙灣嘅麗新集團做過包裝，但以前細路仔冇乜壓力，做嘢唔覺辛苦，賺到錢重自己畀埋書簿費㖭。」
採訪：朱芷瑩
