二○○三年又過咗一大半，原來好多日本女星已經拍定○四年嘅月曆，預備喺九月至十月推出，而噚日出版嘅日本雜誌《Flash》，率先刊登咗十幾位日本女星最新月曆寫真，其中原史奈呢啲新紮水着姐仔，似乎比起上咗位嘅釋由美子更加性感喎。
原史奈、磯山沙也加及若槻千夏等，都係現時日本最活躍嘅水着偶像，佢哋嘅○四年月曆當然唔會好似「過氣麻甩尤物」藤原紀香咁玩密實和服look玩死自己啦，幾位靚女全部都係走性感路線，齋睇原史奈着三點式跪地對鏡頭微笑呢個樣，相信已經可以吸引唔少麻甩fans乖乖奉獻銀両，帶個月曆返屋企慢慢歎。
而榮升阿姐級嘅釋由美子，雖然喺率先曝光嘅月曆照入面冇騷胸，但佢用條大毛巾圍住自己，重露出長腿，相當誘人，相反安達祐實即使繼續搏老命咁拍水着照，可惜又係成碌木咁冇乜創新甫士，似乎欠缺新意。
至於上位新星杏小百合，着住比堅尼坐喺茶几上面，效果重突出㖭！