小記絕對係一個不折不扣嘅高達迷，今次有幸搶先試玩金碟測試版，一玩不得了，裏面收錄咗最經典嘅《高達：一年戰爭》故事，作戰機體重囊括《0083》同外傳《在宇宙閃光的盡頭》經典機體；此外「路線導引」同「球體戰鬥」新系統都好易上手，高達迷必買。
記者、攝影：朱崇德
對應機種：PS2
遊戲類型：動作射擊
發售日：9月4
行貨價格：$432（特別版HK$785）
開發：Bandai
(c)SOTSUAGENCYSUNRISE
繼前作《機動戰士高達》，今次推出新作《宇宙相逢篇》一隔就是2年，相信好多高達機迷都餓咗好耐Game；今次遊戲嘅主故事骨幹，都係圍繞住最經典嘅《一年戰爭》故事，一開機Roll碟，就有一段長達數分鐘的電視版《一年戰爭》片段剪輯；亞寶對老虎的敗戰、亞寶挪挪殖民惑星之相遇，真係令人有一種久違了的感覺；但唔好以為咁就完喇！隨住故事模式一直玩落去，每過完一版打死「大佬」，就會有相對應嘅電視版情節播番出嚟，動畫迷肯定拍案叫好。
現知遊戲內有「對戰模式」，主要是單機之下將畫面切割為左右兩邊對戰，不過香港SCE有關負責人透露，《宇宙相逢篇》會加入網上連線對戰功能，不過礙於香港嘅PS2重未有上網服務，所以只好打住同機畫面分割對戰。
如果完成某特定要求，就會有隱藏新機體選擇，由於遊戲集結了三集故事，相信隱藏機體絕對唔少，最正係連自護軍嘅機體都可以用到！
遊戲加入唔少MS數量，如齋用《一年戰爭》MS，聯邦自護兩邊太過強弱懸殊，而且機體選擇少，影響耐玩性。所以今作折衷地加入《機動戰士0083》及《高達外傳：在宇宙閃光的盡頭》機體，即係香港高達迷最愛嘅GP01系列，同呢期最Hit嘅RX-784號同5號機！遊戲重有一啲好搞鬼嘅機體供駕駛，如鐵球及太空飛艇等，第一關就已經係大魔VS飛艇，你都咪話唔激！
至於系統方面，特別加入「路線導引」同「球體戰鬥」新系統。簡單嚟講，遊戲雖以全3D空戰場景設計，不過加入「路線導引」後，只要你一直向前飛，佢就會自我校正航道，咁就唔使驚全場飛嚟飛去。
除《相逢在宇宙》外，《GT4》亦不斷緊接有新料發放，最新一輯靚圖有唔少新地區跑道睇，從畫面所見，背景複雜得嚟亦好像真，令人相當期待。
