同Cookies去唱卡拉OK，一入大堂，佢哋就開始嘈，因為大家嘅要求好唔同。首先Theresa唔理有冇位，先問：「今晚有乜好食？」Miki插嘴：「有冇主題房，但唔要啲低B公仔？」Kary自顧看着新歌榜，喃喃自語：「周杰倫首新歌呢？」幸好，還是Stephy最清醒，放低會員證，不理三人問東問西，飛奔入房即刻坐喺大電視面前！三餅入到房，大吃一驚，指住Stephy：「乜你咁快點咗三頁歌嗱？」
記者：梁佩芬 攝影：黃子偉
Kary跳唔停
Cookies唱K，原來唔鍾意唱自己啲歌，最好動的Kary更大叫：「日日唱，發夢都唱緊，一定要揀偶像嘅歌！蕭亞軒嘅快歌我就最拿手，難度又高，一定要邊唱邊跳先夠High；慢歌方面，我就鍾意唱男仔歌，周杰倫、許志安、陳奕迅都得！」
格蘭GREENBOX
地址：尖沙嘴格蘭中心1樓
電話：23323112
Stephy攝位叻
唔好誤會，攝位，係指在K房揀個靚位，方便搶咪，又可以成晚霸住個咪唱餐飽！成熟型嘅Stephy最有心得：「如果唱大房，就緊要識得攝個靚位，最正就係梳化同電視中間有條大通道，我一定搬張椅，坐定定喺電視前面，就算睇得辛苦啲都值得，乘機插歌，一舉兩得！」
Miki好奄尖
細細粒的Miki就覺得，最重要間房坐得舒服，尤其顏色不可太花巧，淨色房最OK，今日揀呢間紫色房就令佢眼前一亮。「從未見過K房用紫色，好Warm！去唱K都係想Relax，成房公仔嘅主題房反而好有壓迫感！」
Theresa最為食
最瘦的Theresa反而只要餐牌多食物揀就最開心！「我都知唔可以食咁多煎炸嘢，但K場最多係呢啲，我諗偶然食吓都冇所謂，最多飲多兩杯菊花茶囉！」而最得她歡心就係串燒墨魚丸，佢話一口氣食足三粒至夠爽！
四餅貪新忘舊，今日鍾意A，聽日鍾意B，後日再問佢，又輪到C，五時花六時變，永遠捉不到路，令我替C擔心，不知何時又被拋棄！放心，我不是說緋聞男友，而是她們最近鍾意乜！
Stephy 戴水晶唔迷信
「我總共有七條水晶手鏈，粉紅、黃、黑、白、綠都齊，但我唔迷信，只係當飾物戴，係最Hit嘅Fashion，尤其鍾意一隻手戴晒七條。但話時話，其實條條都係人哋送畀我！」
Miki 打機冇咁悶
「早幾日行街見到部GBAAdvance幾得意，細細個又係彩色，咪買嚟打機囉！我都好耐冇打機，到𠵱家最叻都係玩「孖寶兄弟」！但未可以一次過幾關，希望喺另一個新歡出現前，可以打爆機啦！」
Kary戴帽啱懶人
「因為懶，唔想Set頭，戴頂帽都幾好睇，尤其最近頭髮唔長唔短，可以遮一遮，呢個月我都買咗成二十頂，最多係Cap帽同賊仔帽，其實我最鍾意係紳士帽，女仔戴好型，但我重未搵到。」
Theresa 踢拖好街坊
「都係拍《戀愛自由式》累事啦，早排日日都要去泳池，日日都踢拖，點知踢上癮，拍完劇後，就瘋狂入貨，都有成十對，近期所有活動，我都係踢拖上陣，佢哋次次見我都話：『好街坊喎！』。」
