係人都知新任財爺唐英年有位好健談嘅媽咪，唐少喺福州同記者茶敍時，講開佢位經常洩漏「天機」嘅母親大人時，好無奈咁話唔會同阿媽講公事，但亦冇權限制媽咪嘅言論自由。但講到阿媽公開嫌財爺官邸太細，唐少都唔顧得言論自由咁多，聲明已經叫阿媽唔好再咁講，「好多人重住緊幾百呎地方，你嫌幾千呎屋太細，啲人聽到會點諗？」
官邸房間唔夠分，三個女可能要迫埋一間房住，唐少話正同「愛人同志」度緊可否改裝吓，講開唐太，原來都係福建人。
今次唐少去到福州，初次見福建省省長盧展工，盧省長為打開話匣子，向唐少介紹福建三寶，不過唐少成日打斷話柄。盧省長話第一寶係壽山石雕，因為太珍貴，所以師傅要睇住啲石成個月先動手雕刻，唐少就話，咁咪要上看下看左看右看？盧省長唔知點答嘴，於是介紹第二寶漆畫，講講吓話題扯到去福建武夷山，又講到去福建「土樓」，省長話美國人話福建係導彈基地，其實只係將圓圓嘅土樓相片炒作而成，唐少於是忽發奇想，話如果土樓係方形，咪唔會惹人誤會囉！
話題扯到冇雷公咁遠，搞到省長唔記得講埋第三寶就請記者離開。晚宴時記者捉住盧省長再問第三寶，佢先補充話係牛角梳，呢位省長好豪氣，即時叫隨從準備一套牛角梳送畀香港記者。
（圖）唐少身在福州都不忘講吓屋企人。
傳真︰2623-9278
電郵︰